This isn't my own post. But I found the comment stretching a bit too long in Shuroq's blog so I chose to include it here.
الشاب اللطيف في أثناء الحديث قال هذا أبوي وإذا أبوكم نزل نفسه بالانتخابات ما راح تساندونه؟ فردت عليه عالية: إذا كان شريف. فقام الشاب اللطيف بإعطاء عالية تلك الخزة الطويلة الظاهر مصدق إنه ريّال ويخرع. كان قبل شوي قايل حق شروق إنه لو كان متزوج كان عنده عيال قدها وقايل بعد إن احنا من نكون عشان نقعد نربي ونهذب بأخلاقيات الناس واحنا يهال وما نفتهم (كلمة يهال صايرة تنقال لنا وايد هالأيام بس أول مرة أسمعها من ريال عنده 17 سنة. بس الداهية شروق عرفتله وقالت إي طبعا أنت أكبر منا لأنك ريال) وأعتقد أن هذا السبب اللي خلاه يتوجه حق شباك شروق لأنها فاهمته تمام.
وسألونا ليش تبونها خمس ترى الخمس مو عادلة (شافو الشريطة البرتقالية بسيارتي ما شاالله عليهم نبيهين). وقالوا شلون توزعون فتاوي الطبطبائي مع أنه ضد المرأة. وقالوا عادي ماهي رشوة لأن مرشحنا طول عمره يحب يعاون وسألوا الوالد عن أفضال المرشح على المنطقة (الوالد ضحك لين قلناله، وشر البلية ما يضحك) و بينما شروق قاعدة تحاور المأسوف على شبابه دخل بالسالفة ثالث من أهل الدار يقول لنا أنتو ليش قاعدين تحاورون وتقنعون، بس وزعوا منشوراتكم و خلاص (طبعا الأخ واصل عالسالفة من الآخر وما يدري ولا حتى يبي يسمع أننا ما طلبنا نحاور أحد) لا وبعد كاسرين خاطرة يقول أنتو بنات و ما له داعي تكلمون صبيان بالشارع. يعني يكون ضميره صاحي على هالموضوع وايد.
المهم أن ولدي لما قلناله السالفة قال إي ما عليكم منه هذا كلكشي معاي بالصف و
he's messing with you
وهذا مرة جمع كم دينار من الطلبة بحجة أنه بيرتب لهم حفلة وطلع بالأخير قاص عليهم. الظاهر الابن البار كان يبي يعاون الوالد بحملته الانتخابية ببعض الدعم المادي. عفية عليك يابو عمر. والله عرفت تربي كثر الله من أمثالك.
وسلامتكم
